 |
| Photo from www.ultimatefowl.com |
Sa kasalukuyan ay sikat na sikat ang manok na
Peruvian sa atin. Marami kasing mga sabungerong Pinoy ang nagbi-breed nito.
Bumilib kasi sila sa istilo ng pakikipaglaban ng manok na ito. Multiple
shuffler kasi sila at kapag pumalo ay talagang ubod ng lakas. Kailangan mong
mag-ingat nang husto kapag kukunin mo ang manok na ito kapag ini-spar. Mahirap
na kapag napalo ka dahil siguradong iindahin mo.
Nagtataka
ang ilang sabungero kung bakit nagbi-breed ang iba ng Peruvian. Eh, sa laki ng
manok na ito ay 'di mo naman puwedeng ilaban sa sabungan. Ang Peruvian kasi ay
may tumitimbang mula tatlo hanggang anim na kilo. Kumbaga, sa weight limit pa
lang ng labanan sa atin ay 'di na uubra. Kung ganun, mahilig nga lang ba tayong
makiuso? Hindi naman siguro. Saka hindi naman masamang makiuso kung 'di naman
ito nakasasama sa atin. Isa pa, hindi sisikat o magugustuhan ng marami ang
Peruvian kung wala silang nakikitang espesyal dito.
Oo,
wala pa namang Peruvian derby sa Pilipinas, pero puwede naman natin silang
paliitin sa pamamagitan ng pagku-cross sa Western fowls. Kaya't di na dapat pang
gawing isyu ang sukat ng manok na ito. Marami nang gumagawa sa atin n'yan,
nangunguna na sa listahan si Vic Lacsao na nagkampeon sa Bakbakan 2012 gamit
ang kanyang mga manok na nai-cross sa Peruvian. Ang ilan naman, mas pinipili
nilang panatilihin ang pagkapuro ng Peruvian dahil ipinagbibili nila ito sa
labas ng bansa gaya sa Malaysia, Vietnam, Indonesia, etc.
Ayon
sa mga tala, ang Peruvian ay nagmula sa bansang Peru. Nagsimula itong idebelop
noon pa mang 16th century. Ang dugo nito ay binubuo ng pitong uri ng manok gaya
ng jungle fowl, Asil, Shamo, Sumatra, Old English at American fowl. Kaya't
huwag magtaka kung bakit malalaki at napakalakas ng manok na ito. Tingnan mo na
lang ang Asil at Shamo, 'di ba't ang lalaki nilang mga manok? Huwag ding
magtaka kung bakit mas mahal ang presyo nito kumpara sa Western fowls.
Hindi
natin masasabi kung hanggang kailan magtatagal ang pagkahumaling ng mga
sabungerong Pinoy sa Peruvian. Basta't ang alam natin ay mabentang-mabenta ito
para masubukang palahiin. Posibleng sa hinaharap ay magkakaroon na rin ng
Peruvian derby sa atin. Dedende na rin kung sa magtutuluy-tuloy ang pagkahilig
ng mga sabungerong Pinoy sa manok na ito.
