Meron o Wala: Pagpupungos (Dubbing)

Sa message  sa aking Facebook, tanong  ni Mr. Primo Arroyo ng Mayon, Quezon City … “Kailan nga ba ang tamang panahon o edad nang pagpupungos ng ating mga manok-panabong at ano ang dapat na mga suplemento bago ito pungusan at ano ang mga dapat gawin pagkatapos ng pagpupungos?

Kasagutan: Sir Primo Arroyo, ang panahon o edad nang pagpupungos ng mga panabong,sa akin opinyon po ay siyam na buwan o stag pa lang sila. Ito po ay tiyak na buo na ang kanilang pagkalalaki at namamarako na. Ako po, kapag nagpupungos ginagawa ko ito sa hapon, alas kwatro para po hindi umagas ang dugo. Kasi kapag sa umaga o tanghali ay hyper kadalasan ang ating mga stag. May pagkakataon din na madugo kahit sa hapon tayo nag-dubbing o nagpungos. Ang paraan ko para tumigil ang pagdurugo ay pinapahiran ko ng petrolium jelly.

Pagkatapos  namang magpungos ay binibigyan ng 0.3cc ng Vitamin B-Complex  na turok sa pitsu with Iron para mabawi ang dugo at manumbalik ang lakas ng stag.

Kapag battle cross naman ang ating stag, puwede nating ibitaw matapos pungusan ng isang break hanggang dalawa para masubukan ang kaniyang tapang sa laban. Ang pagkapungos niya ang nagsisilbing sugat sa laban kapag siya ay ‘di nangayaw, senyales na siya ay ganap nang matapang.

May isa pang katanungan si Sir Primo tungkol naman sa " Pagpuputol ng tahid " ay siya kong sasagutin sa susunod.

Salamat sa mga tagasubaybay… sa Meron o' WALA!

Para sa inyong mga mensahe sa awtor ng pitak na ito na si Makuri Makuru, maaari siyang kontakin sa numerong 0915-577-9379/0949-121-2050. 

Meron o Wala: Tibak (Bumble Foot)

Photo Credit: hobbyfarms.com

Tibak o ' bumble foot ! Ano nga ang sanhi at lunas ng sakit na ito?  Pwede pa bang gamitin sa breeding ang manok na tinamaan nito? Ito ang laging nagiging sakit sa ulo ng ating mga ka-MERON o' WALA lalo na kung ang manok pinapalahi natin ay winning line.

Unahin ko po ang opinyon ko at dahilan kung bakit nagkakaroon ang ating alaga ng ganitong karamdaman:

1. Maduming sahig ng kulungan (cage)

2. Overweight na manok

3. Nakalagay sa semento ang ating alaga

4. Masyadong mataas ang flypen o hapunan

5. Nagkasugat at naimpeksyon ang ating mga manok

May natanggap tayong tanong na galing sa text message mula sa ating ka-Meron o' Wala at tagaysubaybay na si Mr. Niki Espanyol ng NuEva Viscaya, " Pwede pa po bang gawin na pang-breeding ang manok na nagkatibak? Ang sagot ko po ay  ganito: Oo basta ito ay nalunasan na at magaling na. Walang naman kasi itong kinalaman sa semilya ng manok. Pero kung sakaling gamitin ito kasalukuyan na nagkatibak at maga pa ang paa, hindi ito mabuti dahil mahihirapang sumakay o sumampa ang broodcock sa inahin. Ito ay dahil nga sa masakit ang kanyang paa.

Marahil ay bitin na naman kayo sa kuwetuhan natin. Sa susunod naman ay tatalakayin ko at ibabahagi ang iba’t ibang paraan ng paggagamot ng tibak sa makabagong teknik o henerasyon ng pagmamanok.

Hanggang sa muli, SA MERON SA WALA!

Para sa inyong mga mensahe sa awtor ng pitak na ito na si Makuri Makuru, maaari siyang kontakin sa numerong 0915-577-9379 at 0949-121-2050.

Meron o Wala: Stag Conditioning

                                            

Magandang umaga mga ka-Meron o Wala! Ang kwetuhan natin ngayon ay tungkol sa napapanahong labanan ng stag derby.

Marahil marami sa inyo ang interesado sa usaping ano nga ba ang tamang suplemento at ehersisyo para sa ating mga stag sa paghahanda bago ang laban?

Marami ang nagsasabi na kapag ang nagkukundisyon sila ng stag ay hindi nila ito masyadong pinapagod. ‘Yung iba naman ay may hardening kung tawagin.

Sa stag supplements naman, ang opinyon ng iba ay natural lang na suplemento ang kanilang ginagamit. ‘Yung mga mahilig naman sa medical na paraan, may ginagamit silang enhancing drug.

Marahil ay may mga katanungan kayo at gusto n’yong malaman ang mga halimbawa ng suplemento at paghahanda. Sa susunod na artikulo ay tatalakayin ko naman ang mga gamit ng ating ka kilalang ka-MERON o WALA nag-kampeon sa sabong sa kanilang iba’t -ibang paraan ng suplemento at sa paghahanda ng stag.

Hanggang sa muli po.  Sa meron o sa wala!

Para sa inyong mga mensahe sa awtor ng pitak na ito na si Makuri Makuru, maaari siyang kontakin sa numerong 0915-577-9379 at 0949-121-2050.

Panoorin ang video:

Meron o Wala: Feather Picking

Mga alagang sisiw ni Makuri Makuru

Isang nagpapanalong araw mga ka-MERON o WALA!

Ako ay nagkaroon ng interes na ibahagi sa inyo ang aking natutunan sa aking araw-araw na gawain bilang isang backyard breeder. Marahil sa ating mga backyard breeder, nakararanas tayo ng "FEATHER PICKING " na problema sa ating mga pa-sisiw pagsapit ng edad na isang buwan hanggang dalawang buwan habang sila ay nasa brooder. Anu-ano nga ba ang lunas sa feather picking o pamamaraan para ito ay maiwasan? Narito po ang ilan sa aking pansariling pamamaraan at marahil ang iba po sa inyo ay nagawa na ito at sana ay makatulong sa iba:

-Tiyaking Ad libitum ang patuka ng ating mga sisiw upang sa ganun hindi sila magutom at maiwasan ang kainan ng balahibo. Tiyakin din sila kinakapos o lagi silang may patuka.

-Kailangan din na maluwag ang espasyo ng ating mga brooder cages at hindi sila congested.

-Maintenance ng B-Complex with iron

-Laging may electrolyte ang tubig

Sa mga susunod na araw ay dadagdagan ko pa ang iba pang teknik galing naman sa ating mga idol na sabungero.

Hanggang sa muli. Sa Meron o Wala!

Para sa inyong mga mensahe sa awtor ng pitak na ito na si Makuri Makuru,maaari siyang kontakin sa numerong 0915-577-9379 at 0949-121-2050.

Meron o Wala: Gamefowl Vaccination

        Kamusta ang laban natin mga ka-Meron o Wala? Sa araw na ito ay ibabahagi ko sa inyo ang madalas na tanong- Paano? Saan at kailan? nga ba magbabakuna ng ating mga alagang-panabong.

Ang Bakuna o Vaccination ay isang proseso na kung saan ay nagbibigay tayo ng depensa sa ating mga alagang manok sa unang araw ng edad hanggang sa sila ay umabot sa tamang gulang. Anu-ano nga ba ang bakuna na dapat gamitin sa unang araw ng ating mga alaga?

Sa unang araw o day 1 ay nagbibigay tayo ng B1B1 Vaccine. Ito ay pinapatak sa ilong at sa mata at ito ay bakuna laban o depensa sa unang araw hanggang isang buwan ng ating mga alaga.

          Marahil isasama ko na rin sa ating kwentuhan ang madalas na problema kung paano nga ba maiiwasan ang bulutong? FOWL POX VACCINE po ang bakuna para maiwasan ang pagkakaroon ng bulutong sa ating mga alaga at ito po ay ibinibigay sa edad na tatlong linggo at isang buwang edad ng ating mga alaga.

Hanggang dito na lang po at marahil ang iba sa inyo at may katanungan pa sa iba pang bakuna sa sipon at tinatawag na booster shot vaccine ito at pagkukuwentuhan naman natin ito sa susunod na araw.

Hanggang sa muli po. Sa MERON O WALA!

 Para sa inyong mga mensahe sa awtor ng pitak na ito na si Makuri Makuru (Supermedz) maaari siyang kontakin sa mga numerong 0915-577-9379 at 0949-121-2050.

IP Man Cobra Butcher ni Makuri

Panoorin ang video:

Biboy Enriquez: Beteranong Gamefowl Breeder sa Pinas

  Si Biboy “Leandro” Enriquez ay isa sa kinikilang mga alamat ng sabong sa Pilipinas. Dekada 60 pa lang ay nagmamanok na siya. Noong 70’s ay sumikat siya dahil sa kanyang Pyle chicken. Katulad ng ibang magmamanok, nagsimula lang din siya sa panunuod at pagsali sa mga hackfight. Pero hindi lang siya basta isang breeder dahil minsan ay naging promoter din siya ng sabong noon sa Teresa, Rizal.

          May mga nagtatanong, saan nga ba nakuha ni Biboy ang pangalan ng kanyang farm na Firebird? Ayon sa kanya, noong araw ay hanga siya sa entry name ni Don Amado Araneta na Thurderbird kaya’t naisip niya na ano kaya kung Firebird naman ang gamitin niyang pangalan sa kanyang farm. Bukod dito ay kinuha niya rin ito sa pangalan ng sikat na sport car ng Pontiac company. Siyempre, kung magpapangalan na lang din ng farm ay ‘yung may dating na.

          Sa umpisa ay nagpalahi ng manok si Biboy sa kanilang bakuran sa may Blueridge, Quezon City at saka sa Commonwealth Avenue. Pagkatapos ay nakapagtayo siya ng farm sa may Antipolo at kinalaunan ay lumipat sa Laguna hanggang sa naitayo niya ang kanyang 20 hektaryang farm sa may Sitio Dalawang Kawayan sa may Brgy. Tandang Kutyo. Nabili niya ang farm niyang ito dahil sa panalo niya sa sabong noong magkampeon siya sa may Roligon.

          Si Biboy ay dating hotelier, dati siyang nagmamay-ari ng Sulu Hotel na namana niya sa kanyang ina na nagtayo nito noong 1967. Nagpasya siyang ibenta ang hotel dahil ‘di na niya maharap pa ang responsibilidad. Mas pinili niyang maging isang fulltime breeder dahil mas nag-i-enjoy siya rito. Tingnan mo naman, sa edad na mahigit sisenta ay malakas pa rin ang kanyang pangangatawan. Machong-macho pa rin, ‘ika nga. Ito ay dahil na rin sa pagiging health concious niya. Pinipili na niyang mabuti kung ano ang kanyang kakainin. Mahilig siyang mag-exercise at nagsasagawa rin ng yoga. Maliban dito, naniniwala siyang malaki ang kontribusyon ng pagmamanok kung bakit nananatiling malusog ang kanyang pangangatawan. Bakit nga ba hindi? Eh, talaga namang  nakakapagpasigla ng ating katawan ang pagmamanok.             

          Kinikilala si Biboy bilang Kelso Man of the Philippines dahil mahuhusay ang manok niyang Kelso na nagmula kay Johnnie Jumper. Ikinirus niya ito sa Sweater at talaga namang naging maganda ang resulta. Siyempre pa, kilala rin ang kanyang linyada na tinatawag niyang Super Sweater na nagsisilbing signature line niya. Nakuha niya ang manok na ito mula kay Carol Nesmith. Mayroon din siyang High Action McLean, ikinurus niya ito sa Harold Brown line at ininfused niya sa Roundhead at Kelso. Mayroon din siyang Yellow Legged Hatch na nakuha naman niya kay Buddy Mann.

          Noong 2012 ay dinibelop ni Biboy ang kanyang manok na minsan ay tinawag niyang Robie White, throwback ito ng Kelso. Hinango niya ang pangalan ng manok niyang ito mula sa kanyang farm manager na si Robie Yu Panis na kinikilang prinsesa ng tari sa Pilipinas. Wala diumano itong kuneksyon sa Amerikanong breeder na si Roby White taliwas sa sinasabi ng iba. Magkatunog lang ang kanilang pangalan, pero magkaiba ng spelling. Inilaban nila ang linyada ito sa pa-derby ng Laguna Gamefowl Breeders Association noong September 2012 at nakaiskor sila ng limang magkakasunod na panalo. 

        Bilang isang beteranong magmamanok, marami na ring kampeonatong pinagdaanan si Biboy at ang pinakamalaki rito ay noong magkampeon siya sa World Slasher Cup noong 1994. Ginamit niya  rito ang kanyang Roundhead, Grey at Lemon. Nooong 2003 ay naging runner up siya, sa World Slasher Cup pa rin. Naging kampeon din siya sa 9-Cock International Derby ng United Cockers Association of the Philippines noong 2002.  Hanggang ngayon ngayon ay patuloy pa ring lumilikha ng ingay sa mundo ng sabong si Biboy dahil patuloy pa ring nagpapakita ng husay sa kanyang pagmamanok. 

Makuri Makuru: Wizard of Modern Day Gamefowl Sports

Makuri Makuru

Masasabi nating mabilis na talaga ang pag-unlad ng sabong sa ngayon. Dahil kahit ultimo mga backyard breeder ay 'di pahuhuli kung pagmamanok lang ang usapan. Pero ibahin natin si Makuri Makuru ng Floodway, Cainta, Rizal na bagama't may tatlong taon pa lang mula nang nagsimulang mag-breed ay marami na siyang nagawa para sa minamahal nating isport.

Nagsimulang mag-breed si Makuri sa tulong ng kanyang mga kaibigan na sina Ernest Gonzales, Audie Avenido, Kit Soliman at Paolo Malvar. Ang una niyang naging bloodlines ay ang Sweater galing kay Ernest na taga-Bacolod at Cobra na galing naman kay Kit. Hanggang ngayon ay iniingatan pa rin niya ang mga bloodline na ito. "Unang breeding ko, 90 percent agad ang nanalo sa mga sabungan at sa mga hackfight," masayang sabi niya.

Pero ang talagang nakinabang sa kanyang mga bloodline ay ang kanyang mga kliyente sa iba't ibang parte ng Pilipinas na nababalitaan niyang nagpapanalo sa local derbies gamit ang manok mula sa kanya.

Limitado lang ang bilang ng mga manok ni Makuri. 'Di siya makapagparami dahil maliit lang ang kanyang espasyo.  Sa ngayon ang kanyang bloodlines ay umiikot lang sa tatlo, ang mga ito ay ang IP Man Cobra, Walkee Talkee Grey at Boston 357.

Hatchery Home

Bukod sa pagiging gamefowl breeder, si Makuri rin ay isang musikero at kompositor. Available ngayon sa Spotify ang mga kanta niyang Ngayong Gabi at Paborito na ginawan pa niya ng bersiyon para kay Pope Francis (Papa Kiko) nang minsan itong dumalaw sa bansa noong 2014. Ayon kay Makuri, "Yung pagtitimpla mo ng tono o pag-compose ng kanta parang breeding din 'yan; tinitimpla mo ang komposisyon ng mga dugo. Kung paano ka gumawa ng battlecross at kung paano mo imi-maintain ang winning line". Marami diumanong kumbinasyon ang breeding, parang sa musika rin. Kumbaga, kailangang maganda ang kumbinasyon ng mga cords para magandang pakinggan.

Naging adbokasiya na rin ni Makuri na tumulong sa kanyang mga kalugar na mga backyard breeder. Kung kaya't naisipan niyang magtayo ng tinatawag niyang 'hatchery home'. Mayroon siyang magkahiwalay na heater at hatchery na mayroong 300 eggs capacity. Wala kasing incubator business sa kanilang lugar. Maraming mga backyard breeder sa kanila ang 'di alam kung paano ang tamang pagpapapisang itlog. Maliban dito, tinuturuan din ni Makuri ang mga ito kung paano ang tamang paraan nang pagbi-breed at pagka-candling. Kapag may problema sila  sa manok ay pinupuntahan o ipinapatawag pa nila si Makuri.

Gamot na dinibelop ni Makuri

Bibilib ka rin kay Makuri dahil nakagawa siya o nakapag-formulate  ng sariling gamot sa pagkukundisyon ng manok. Tinawag niya itong Supermedz. Noong una ay ginagamit lang niya ito para sa personal niyang laban. 'Di naman siya madamot kung kaya't ibinabahagi niya ito sa mga gusto ring makagamit. Hindi lang ito sa Pilipinas ito nakararating kundi maging sa ibang bansa. Katunayan, ito ang nagdala sa kanya sa Indonesia para lumaban, sa imbitasyon ng mga tinitingalang gamefowl breeder doon. "Ito ang gamot na napakasimpleng gamitin para sa laban. Madali lang gamitin sa pointing. 'Di na kailangan pa ng mahabang instruction," paliwanag ni Makuri. Natatawa pa niyang sinabi na ang iba niyang mga costumer ay ayaw ipagsabi na Supermedz ang kanilang ginagamit dahil baka ayaw na silang labanan.

Naging bahagi rin si Makuri sa sabong media, ito ay nang maging camera man siya sa programang Bakbakan nina Mr. Joey Sy at Eddie Boy Ochoa. Marami siyang natutunan sa mga ito. Masaya si Makuri dahil nakasama siya sa pag-interview sa mga kilalang breeder kung saan ay nakapulot pa siya ng mga teknik sa pagmamanok.

Sa ngayon, wala namang ibang plano si Makuri kundi ipagpatuloy at pagbutihin pang lalo ang kanyang mga ginagawa. Aniya, "Di ko namang planong mag-commerical masyado. As long na 'yung mga client ko nagpapanalo sa bloodlines ko at sa tulong ng Supermedz masaya na ako. Andun 'yung fullfilment ko bilang breeder".

Maaaring kontakin si Makuri sa mga numerong 0915-577-9379 at 0949-121-2050.